Gerum okkar golf skemmtilegra

Golf snýst fyrst og fremst um að hafa gaman — og ein leiðin í því er að búa til skemmtileg mót, halda utan um tölfræði og spila með vinahópnum.

Ég hef alltaf haft gaman af að skipuleggja leiki og halda utan um þá. Við höfum til dæmis notað Gamebook, sem var gríðarleg breyting og gerði leikinn skemmtilegri. Við strákarnir spilum á mánudögum yfir sumarið, og ég hélt utan um allt í monster-Excel-skjali — leiki sumarsins, sumarmótið, holukeppnina og ýmsa tölfræði eins og hver hitti grínið. Ég hafði meira að segja reynt að ná tölfræði úr Golfbox handvirkt, sem var ansi seinlegt.

Svo kynntist ég Claude, og það breytti öllu. Ég byrjaði á að koma sumarmóti okkar strákanna á netið, fór svo að sækja gögnin úr Golfbox til að leika mér með, og þaðan út í að setja upp lítil fjölskyldumót. Það er magnað hvað hægt er að gera.

Þetta er hobbí hjá mér — en líka svolítið tilraunaverkefni. Mig langaði að prófa hversu langt ég kæmist með hjálp Claude, og kanna hvort ég, óreyndur forritari, gæti sett saman og sett á netið afurðir sem aðrir gætu nýtt sér. Ekkert af þessu er gert í hagnaðarskyni.

Úr þessu eru orðnar til þrjár afurðir — hver með sínu hlutverki:

Deildin okkar

Fyrir golfhópa sem halda utan um tímabilið sitt saman. Röðun þar sem bestu hringirnir telja, holukeppni allra á móti öllum í krossatöflu, tölfræði eins og fugla, erni og „næstur holu", forgjafarþróun hvers leikmanns yfir tímabilið, og mæting fyrir hvern leikdag. Það sem byrjaði sem stigaskjal er orðið að litlu félagskerfi fyrir hópinn — og virkar allt árið, líka fyrir vetrar-hermi.

Skoðaðu og prófaðu hvernig uppsetningin virkar á tilbúnum gögnum — er þetta eitthvað sem þinn hópur gæti notað?

Skoða →

Mitt eigið golf, í tölum

Persónulegt mælaborð sem les alla hringina mína beint úr Golfbox og breytir þeim í þróunarsögu. Forgjöf yfir árin, frammistaða eftir völlum og holum, „draumahringurinn" — besta skor sem ég hef nokkurn tímann náð á hverri einustu holu lagt saman — og helstu áfangar á ferlinum. Þetta er greiningin sem ég vildi sjálfur sjá um mitt eigið golf.

Prófaðu að sækja þín eigin gögn — er versta holan þín í alvörunni versta holan þín?

Skoða →

Haltu þitt eigið mót

Tæki til að halda golfmót með rauntíma-uppgjöri. Hvert lið eða holl skráir á sinn eigin síma, og til að enginn geti lesið stöðuna fyrirfram telur hola ekki fyrr en allir hafa skráð hana. Í lokin er uppgjörið afhjúpað hola fyrir hola og endar á verðlaunapalli. Sami kjarni styður holukeppni liða, einstaklings-Stableford og Texas scramble, bæði á 9 og 18 holum.

Búðu til þitt eigið prufumót — gæti þetta gert mótið þitt skemmtilegra?

Skoða →

Styrkjum Framför

Ekkert af þessu kostar neitt í sjálfu sér — en mín skoðun er sú að allt sem er frítt sé vanmetið. Þess vegna er notkun á einhverju af þessu háð frjálsu framlagi til Framfarar, stuðningsfélags karla með krabbamein í blöðruhálsi og aðstandenda. Sjá nánar undir einstaka síðum.

Gögn og persónuvernd

Þessi forsíða safnar sjálf engum gögnum — hún er bara kynning og hlekkir á vörurnar. mittgolf er með sína eigin persónuverndarstefnu sem lýsir því hvaða gögn eru sótt úr Golfbox og af hverju. Deildin og Mót geyma aðeins þau nöfn, skor og forgjöf sem þarf til að halda utan um hópinn eða mótið — ekkert er selt eða deilt áfram til þriðja aðila.